श्री मारवाडी राजस्थान शिक्षण संस्था, लातूर संचलित श्री गोदावरीदेवी लाहोटी कन्या विद्यालय हे भारताला स्वातंत्र्य मिळण्यापूर्वीच म्हणजेच १९४६ मध्ये स्थापन झाले. मुलींना अर्थपूर्ण शैक्षणिक संधी उपलब्ध करून देणे आणि त्यांना सुसंस्कृत, जबाबदार, आत्मविश्वासू व सक्षम नागरिक म्हणून घडवणे या उदात्त ध्येयाने या विद्यालयाची स्थापना झाली.

श्री गोदावरीदेवी लाहोटी कन्या विद्यालय ही बालवाडी ते इयत्ता १० वी पर्यंत मराठी आणि सेमी-इंग्रजी माध्यमातून दर्जेदार शिक्षण देणारी शासनमान्य अनुदानित शाळा आहे. मराठवाड्यातील पहिली कन्या शाळा म्हणून या संस्थेला या भागाच्या शैक्षणिक इतिहासात एक अत्यंत मानाचे आणि ऐतिहासिक स्थान लाभले आहे.

आमच्यासाठी शिक्षण म्हणजे केवळ शासनाने ठरवून दिलेला अभ्यासक्रम पूर्ण करणे किंवा केवळ शैक्षणिक धोरणांची अंमलबजावणी करणे नव्हे; तर प्रत्येक विद्यार्थिनीला एक परिपूर्ण, सक्षम आणि प्रत्येक क्षेत्रात यश मिळवण्यासाठी सज्ज व्यक्तिमत्त्व म्हणून घडवणे हे आमचे मुख्य उद्दिष्ट आहे.

गोदावरीदेवी लाहोटी कन्या विद्यालयाची विद्यार्थिनी म्हणून, प्रत्येक मुलीला आपली सुप्त क्षमता ओळखण्यासाठी, कलागुणांना वाव देण्यासाठी आणि समाजात सकारात्मक योगदान देण्यासाठी सतत प्रोत्साहन दिले जाते. विद्यार्थिनींमध्ये सामाजिक, सांस्कृतिक, नैतिक आणि मानवी मूल्यांची भक्कम पायाभरणी करण्यासाठी विद्यालय निरंतर प्रयत्नशील आहे.