या दृढ विश्वासाने प्रेरित होऊन, महात्मा ज्योतिराव फुले व सावित्रीबाई फुले यांच्या विचारांचा आदर्श समोर ठेवून, १९४६ मध्ये स्वातंत्र्यपूर्व काळात आणि निजाम राजवटीत श्री गोदावरीदेवी लाहोटी कन्या विद्यालयाची स्थापना झाली. शैक्षणिकदृष्ट्या मागास असलेल्या मराठवाड्यात लातूरमध्ये मुलींची शाळा सुरू होणे ही स्त्री शिक्षणातील ऐतिहासिक घटना ठरली.

“ज्याच्या हाती पाळण्याची दोरी तो जगाते उद्धारी” या उक्तीप्रमाणे, थोर समाजसेवक व दानशूर कै. पूरणमलजी लाहोटी यांनी आपल्या भावजयीच्या स्मरणार्थ १९४६ मध्ये ही शाळा सुरू केली. श्रद्धेय स्वामी रामानंद तीर्थ, कै. बाबासाहेब परांजपे आणि समाजसुधारक कै. माई दिवाण यांच्या आशीर्वाद आणि प्रेरणेने या कार्यास गती मिळाली.

शाळेच्या स्थापनेचा व बांधकामाचा संपूर्ण खर्च लाहोटी कुटुंबीयांनी आपल्या वैयक्तिक निधीतून केला. लातूरचे शिक्षणप्रेमी कंत्राटदार कै. दीनानाथ वासुदेव सावे यांनी सामाजिक बांधिलकीतून शाळेचे बांधकाम पूर्ण केले. १९४६ ते १९६० या प्रदीर्घ काळात विद्यार्थिनींना पूर्णपणे मोफत शिक्षण देण्यात आले. मुलींसाठी खास पुण्याहून शिक्षिका आणल्या गेल्या आणि त्यांना सुरक्षितपणे शाळेत आणण्यासाठी पडद्याच्या टांग्याची सोय करण्यात आली होती.

१९५४ मध्ये शेठ पूरणमलजी यांच्या निधनानंतर कै. नारायणलालजी लाहोटी यांच्या नेतृत्वाखाली शाळेची प्रगती सुरू राहिली. १९५५ मध्ये मॅट्रिक परीक्षेची पहिली तुकडी उत्तीर्ण झाली (१५ पैकी १० विद्यार्थिनी उत्तीर्ण). १९५८ मध्ये प्राथमिक व माध्यमिक विभाग स्वतंत्र झाले. १९६० मध्ये ही शाळा अधिक विकासासाठी 'श्री मारवाडी राजस्थान शिक्षण संस्था' या मातब्बर संस्थेकडे सोपवण्यात आली.

मुख्याध्यापिका श्रीमती मालतीबाई म्हैसकर यांच्या कार्यकाळात ५ वी ते १० वी साठी प्रत्येकी तीन तुकड्यांना मान्यता मिळाली. १९९६ मध्ये शाळेचा 'सुवर्ण महोत्सव' ज्येष्ठ सामाजिक कार्यकर्त्या प्रा. पुष्पा भावे, प्रा. हेमलता पाटील व न्यायाधीश संघमित्रा मांजरेकर यांच्या उपस्थितीत संपन्न झाला. २००६ मध्ये शाळेने 'हीरक महोत्सव' साजरा केला, ज्याचे समारोप तत्कालीन केंद्रीय राज्यमंत्री श्रीमती सूर्यकांता पाटील यांच्या हस्ते झाले.

आपली यशस्वी ७८ वर्षे पूर्ण करून ८० व्या वर्षात (ऑक्टोजेनेरियन) पदार्पण करताना, श्री गोदावरीदेवी लाहोटी कन्या विद्यालय ज्ञान, चारित्र्य, आत्मविश्वास आणि महिला सबलीकरणाचा हा पवित्र वारसा अखंड पुढे नेत आहे.